Gabay:Nabadgoob Waxa curiyey Hal Abuur Siciid Yuusuf Maxamed (Gabare).

Gabaygan waxa tiryay Siciid Yuusuf Maxamed (Gabare) ,Kagana Hadlayo Ahmiyada ay Nabaddu u leedahay noolaha.

Wacyigelintu waynoo dux iyo erey dareenkiis e

Oo dardaaran u ah aadamiga inay dareemaane

Oo makhluuqu daba joogo oo marin dawaafaaya

Oo ciddii ka daba leexataan dowga ku aroorin

Dabin xumuhu soo daadshay bay dalaq tidhaahdaaye

Ana maanta ila daya halkaan diirada u jeedshay

Oo u fura damiirkiyo dhegaha ereyga aan doortay

Dadoow nabaddu waa shay dugsiyo daawo nololeed ah

Wax la yidhi dagaal beri dhacoo duunyo ku idlaatay

Inta foodda lays daray ayaan daw la kala yeelan

Markii uu dayaankii dhacee hilibku duulduulay

Ayaa ay duqaydii gashoo dabar go’ii baaqday

Oo damal hadhwayn loo gogloo hawshi lagu diiray

Oo sabada dayr looga dhigay duul midnimo doonay

Markii geellu  dararree naflii diiftii laga maydhay

Ayaa kii dabkaba oogay ee dirirta heenseeyey

Dib u eegay waayii dhaciyo noloshii diihaalka

Wuxuu yidhi dugaag baa na cunay oo dig naga siiyay

Wixii dacas na soo gaadhay ee boodhhku nagu duulay

Duurkaan ku jiray maalmahee diiftu igu haysay

Dayacaan la eedaaday iyo meeshii dirir joogay

Diihaalkii naflaha gaadhay ee diirta lagu laayay

Dar Ilaahay waxaanaan ka darin nolosha daanyeerka

Maantana darkaan joogo iyo doorka noloshayda

Doogiyo naqaa baxaya ee lagu damaashaaday

Aroosyada darfaha laga dhisee ooshu wada daartay

Dadoow nabaddu waa shay dugsiyo daawo nololeed ah

Dacallada adduunkiyo halkii degel ka seesmaayo

Halkuu degay makhluuq ee khalqigu nolol ka doonaayo

Magaalooyinkaa dabqyadiyo daaraa laga taagay

Dugsiyada aqoontiyo cilmiga lagu daraaseeyo

Darka xoolo ka cabbaan midkii ramadku daaqaayo

Diyaaradaha samadiyo intii dooni raranaysa

Dukukuur ma yeesheen hadday nabaddu daandaanto

Oo ay colaad diiran iyo hogo dagaal gaadho

Dadoow nabaddu waa shay dugsiyo daawo nololeed ah

Nalka waxa u daaroo mujtamici daaha uga qaada

Waxa dib u dhac ka ilaaliyoo dabar u diidaaya

Aan dagin barbaartooda iyo idil udqaydooda

Daryeelkoodu waa nabad haddii daaqad laga eego

Dadoow nabaddu waa shay dugsiyo daawo nololeed ah

Daayinkii dadkiyo duunyadiyo dunidan aasaasay

Daayinkii colaad naga didshee  nabada noo dooray

Daayinkaan nakala dayrin ee aan na kala doorin

Dadyow waa innaan mahadinaa dagalkaan joognaaba

Daayinnoow dilaagii xun iyo kii hanfiga daara

Duli qaba dhagartiyo denbiga duudka raranaaaya

Ee boogihii laga darsaday dogobka saaraaya

Daayinnoow adaa dagi karee gelin hanoo daynin

Dadoow nabaddu waa shay dugsiyo daawo nololeed ah

Waxa kownka dahab yaala iyo duunyo lacageed ba

Haddii laysku daroo habeen laysla wada doonto

Nabad lagama doorsado haddii daacad laga eego

Dadoow nabaddu waa shay dugsiyo daawo nololeed ah

Berde daatay midhihii daray xoolo dararaaya

 Halo dihin darmaan farasa iyo baarqab doobinaya

Caanii Dahabo xoorkii Dalays doobi lagu keenay

Durdur ceela oo dooxo mara dulundulcaynaaya

Kayn Yac daaqay oo uu Atoor dacal ku dheelaayo

Intaasiba markaad daawatee dulucda sii raacdo

Nabadday ku doodaan nasriga ugu duceeyaanna

Dadoow nabaddu waa shay dugsiyo daawo nololeed ah

Waxaan ugu danbayn doortay aan gabayga deeqsiiyay

Da’yarteenan suuqyada galee dulundulcaynaaya

Ee dumar wax iibsanaya iyo gaadhi daba jooga

Ee fiidka dalandooliyee deriska shiidaaya

Dafaya haatufyada ee iyagu  duluca siibaaya

Nabadday dureeyaan haddaan waano lagu deeqin

Daayinoow adaa deeq baxshee nabad ha noo diidin

Dadoow nabaddu waa shay dugsiyo daawo nololeed ah

Siciid Yuusuf Mohamed Gabare

    Erigavo Somaliland