Sanaag Mar Soo Arag. Qore:Qoraa Saddam Xuseen Carab.

                                         

         Sanaag Mar Soo Arag

Inta Qofku Noolayahay Waxa Jira Waxyaalo Saamayn ku Yeesha Noloshiisa ,Qadhaadh iyo macaanba waa leeyihiin,Dhamaantood Casharo iyo Waayo-Aragnimo Ayaa LAga Korodhsadaa.in aad dad waayo arag ah la kulanto iyo inaad dhul iyo deegaan cusub tagtaa iyaba waa casharada Nolosha Tabtaas oo Kale inaad socdaashaa Waxay Kugu yeelataa Saamayn ,Safarku haa,Qofka saamayn badan oo tognaan iyo tabnaan ba leh ayuu ku yeeshaa .

Waxa badhtimihii BIsha Septemper Ee sanadka 2013 Xiiso Badan ayay ii lahayd inaad u diyaar garoobo safar shaqo ,Safarkii U horeeyey noloshayda ee aan ku tago Gobolka Sanaag ,Sanaag ,Daallo iyo surad,Tabca iyo meelo cajiib ah ayey caan ku tahay,Dalxiiska Waa meel loo Majeerto Waxaan u Hayey xiiso BAdan oo laabta I xara dhaamiyey .Haa Adba hadii Aanaad arag waad jeceshahay ama jeclaan doontaa mar uun inaad tagto Dabadeed Buuraha Dalxiiska Dushooda Taxtaxaasho,Saw Sidaas Maaha?

Hargeysa oo aan Kasoo Socdaalay iyo ceerigaabo Waxay isu jiraan ilaa 700km ,Masaafo yar ma aha ,kala badh waa dhul adag oo aan jid hagaagsan lahayn ,buuro iyo ah ban cidlo ah ,sided saacadood oo aanu Safar burco ka bilowday ku jirney kadib waxaanu gaadhney ceerigaabo oo meel god ah dhulka kaga jirta .

Intii aananu gaadhin ceerigaabo ,banka saraareed ee dhererka ku faana,oo badi barwaaqo ah ayaanu sii jeexnay .

Xoolo adhi iyo geelba leh ayaa meelaha qaar dhex mushaaxayey ,deegaan barwaaqo ah Weeyaane,daaqa iyo dareemadu waxay ay ahaayeen kuwo is qabsaday .

Magaalada cimilada U horreysa ee aad geleysaa Waa mid qabow ah ,Dhulka Cagaarka ah (Gaar ahaan bisha 9aad),Jawiga haadiga ah iyo deegaanka qurxoon Ayaan aad ula dhacay .

Go’ iyo Koodh iyo wax dhaxanta laga gashado ayaa lagu wada shaqlanaa,Siiba casarka ilaa caweyska dambe,Laakiin intaas oo dhan waxa dareenkaygu kaga mashquulay duqayda tirade badan ee ku nool magaalada.

Ceerigaabo waxaan ku arkay in ka badan magaaloyinka inta odayaal tiradaas iyo da’daas leeg aan ku arkay ,Alle ha u naxariistee Xaaji Aadan Axmed (Af-qalloc)oo boqolka wax badan dhaafay baan markiiba soo Xasuustay ,illen isba reer Ceerigaabuu ahaa!

Maxay ceerigaabo kaga gedisanatahay meelaha kale Ayaan is weydiiyey ?Tolow ma dadka ku nool ayaa dadka ka cimiri dheer mise waa si kale?

Dad baa ii sheegay in in dhulka qaboobaha ahi sabab u yahay cimri dhererka ,dadkale ayaa iyaguna sababo kale ii sheegay ,si kastaba ha noqotee Ceerigaabo waa Magaaldii  Duqayda .

Magaaladu halkaa haynoo joogto’e,dibadda iyo dhulka dalxiiska meel kamid ah Ayaan Iyana gaadhay ,waxa aan kusoo arkay jannoyinka adduunka wax kamid ah oo cajab badan.

Waxa aan aan tagey gubanka Caraareed oo ay buurta Daallo Kor kaga beegantahay Xeelliga Maydhna koonfur kaaga bidhaamayo .

Waxa lasii maraa dawga Tabco iyo buuro tiro badan oo ka sokeeya ,ilaahay abuurtiis way noocyo badantahay.buuro dherer iyo baaxad ku awood sheegta oo aad mooddo deyr weyn oo dhulka ku qotoma oo cirka ku dhammaada ayay aragtida ishaadu ku libdhaysaa ,Markaad kor u jalleecdo ayaad marar moodaysaa in buurtu kugusoo dhacayso ,laakiin awood qarsoon ayaa halkeeda ku haysay .

Tiradu ma ahayn mid ama laba waa arlo dhan oo ilaahay ku teediyey buurahaas daruuraha gaadhaya ee ceeryaantu ku shaqlantahay had iyo goor.

Ma ahayn buuruhu omos iyo dhagax iyo qarfo .

Ciidda iyo quruuruxa ay kan u ankanyihiin inaad aragtaa waa dhif iyo naadir.

Dhirta cagaarka ah ee boqolka jaad ah ee ku gadaaman ayaa wax walba kaa qarinaysa .

Eegmadu marna marna kama xiisa goynayso daawasha awoodaha ilaahay ee noocyada badan.

Buuraha hirarka ah hadii ay muddo ishaadu ku negaato waxa aad ka dhex arkaysaa sawiro kale iyo muuqaallo aan marka hore kuu muuqan .

Waad ku raaxaysanaysaa daawashadooda,Kaman xiiso goynaysid.wax yaab leh oo aan kusoo arkay sanaag ayey kamid ahayd.

Dhulka huwan doogga iyo daaqa waxa kasii qurux badnaa dhirta boqolka jaad ah ee buuraha iyo bannanada xidhiidhsan .

Waa dhir udug ,dhir cagaar iyo dhur quruxeed.hadii urtu in uun dabiib ka noqon lahayd xanuun jira ama jiri doona ,dhirtaas udugeeda ayaa daawo iyo dabiib looga dhigi lahaa .marka ay sankaaga xusho neecawda urta ku rarran ee dhirta soo dhex jibaaxday ayaa ay ilaa maskaxda ku dhex qaadaysaa,mararka qaar waxa ay maskaxdaadu u eekaanaysaa wax cusub oo hadda dhashay oo wax walba oo lagu kaydiyo u madhan.

Waxa ay ahayd meel yaab leh!

Sidaa si le’eg ayaa daawashada ubaxa iyo maanka dhirtaasi u daweyn karaa indho basaasay iyo kuwo busaarsadey labadaba.

Maalinta oo idil,cirka daruuro is hirdiyaya iyo hogolo is habaynaya oo inay horaan diyaar u ah ayaa sidaa iyo sidaa u dul damaashadayey.

Daruuruhu waxay u ee kaayeen kuwo nida ku maray in ay buuraha iyo dhirta iska dhex baxay guntooda iyo guudkooda biyo ku shubaan .

Maalintii laba ama ka badan oo goor way hooraan siiba waqtigan aan tagey.waxase xaqiiqdu tahay intaasi oo dhami in aanay ahayn dabeecad meel dhulka ka mid ah lagu arko oo inta la daawado la iska dhaafo uun,se ay tahay aayado rabi oo rumayntiisa ku xoojinaya .waxa ay idilkood ahaayeen wax cibro iyo cashar leh oo aan kusoo arkay Sanaag.

Waxa hubaal ah inta aan soo arkay in aan qalin iyo af midina lagaga sheekayn Karin.

Waxa sidoo kale la hubaa in intaas iyo in ka badan oo aanaan aragi ay jiraan .

Casharo caqiidadda qofka kor uqaadaya ayaa laga soo korodhsanayaa safarkaa iyo kuwa u dhigma ,casharo maskaxda kuu dejinaya oo aad ka mabsuudayso ayaad kazoo baranaysaa.casharo ku ogeysiinaya hodontinimada arladeena ayaad arkaysaa oo aad soo baranaysaa.

Safarkan iyo kuwa la mid ka ahiba wax ay ku geynayaan duni hore kaaga qarsoonayd oo qiime iyo qaayo leh.

Hadaba waxa aan kugu la talin lahaa haddii aanaad hore u tegin Sanaag,in aad mar soo booqato.

Hadii aad hore u aragtay in aad mar iyo marar kale ku noqotaa waa aqoon iyo dalxiis iyo duni naftaadu u baahantahay ,Dhulka yaabka leh ee Sanaag ,Mar soo Arag.

Qore:Saddam Xuseen Carab.